ຫ້ອງວ່າການສູນກາງພັກ ໄດ້ຈັດຕັ້ງເຜີຍແຜ່ເຊື່ອມຊຶມ ເອກະສານ ດຳລັດສະບັບເລກທີ 599/ລບ ວ່າດ້ວຍລົດຂອງລັດ ໃນວັນທີ 15 ສິງຫາ 2022 ພາຍໃຕ້ການເປັນປະທານຂອງ ສະຫາຍ ເພັດຖາວອນ ພິລາວັນ ຄະນະປະຈຳພັກ, ຮອງຫົວໜ້າຫ້ອງວ່າການສູນກາງພັກ ໂດຍມີບັນດາ ພະນັກງານຂັ້ນກົມ, ພະແນກ ແລະ ພະນັກງານທົ່ວຫ້ອງວ່າການສູນກາງພັກເຂົ້າຮ່ວມ. ທັງນີ້, ກໍເພື່ອເປັນການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ ແລະ ຈັດຕັ້ງປະຕິບັດ ຕາມດຳລັດສະດັ່ງກ່າວ.
ໂອກາດນີ້, ສະຫາຍ ສົມບູນ ລັດຕະນະພອນ, ຮອງຫົວໜ້າກົມຄຸ້ມຄອງຊັບສິນແຫ່ງລັດ, ກະຊວງການເງິນ ໄດ້ເຜີຍແຜ່ບັນດານິຕິກຳດັ່ງກ່າວ ເພື່ອເປັນການຈັດຕັ້ງຜັນຂະຫຍາຍ ວາລະແຫ່ງຊາດວ່າດ້ວຍການແກ້ໄຂຄວາມທຸກຍາກດ້ານເສດຖະກິດ-ການເງິນ ແລະ ທັງເປັນການຄຸ້ມຄອງຊັບສິນຂອງລັດ ໃຫ້ເຂົ້າສູ່ລະບຽບການ ແລະ ເປັນການປະຕິບັດດຳລັດເລກທີ 599/ລບ, ວ່າດ້ວຍລົດຂອງລັດ ກໍຄື ການປະຢັດມັດທະຍັດ, ຕ້ານການຟູມເຟືອຍ ແລະ ຈຳກັດລາຍຈ່າຍງົບປະມານ, ການຄຸ້ມຄອງລົດຂອງລັດ ກໍແມ່ນໜຶ່ງໃນມາດຕະການປະຢັດ ແລະ ຄຸ້ມຄອງການນຳໃຊ້ພາຫະນະຂອງທາງລັດຖະການຖືກເປົ້າໝາຍ, ມີຄວາມໂປ່ງໃສ, ມີລະບຽບວິໄນ, ສາມາດກວດສອບໄດ້ ແລະ ສອດຄ່ອງກັບເງື່ອນໄຂຕົວຈິງຂອງປະເທດເຮົາ. ພ້ອມນັ້ນຍັງໄດ້ກຳນົດຂອບເຂດໃນການນຳໃຊ້ລົດຕາມແຕ່ລະຕຳແໜ່ງບໍລິຫານ ຢູ່ບັນດາອົງການຈັດຕັ້ງພັກ-ລັດ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ຢູ່ສູນກາງ ແລະ ໃນຂອບເຂດທົ່ວປະເທດ ເຊິ່ງລົດທຸກຄັນທີ່ນຳໃຊ້ວຽກບໍລິຫານລວມ, ລົດຮັບໃຊ້ວຽກວິຊາສະເພາະ ແລະ ລົດວິຊາສະເພາະ ແມ່ນຈະໄດ້ຕິດກາໝາຍ “ລົດຮັບໃຊ້ວຽກງານທາງລັດຖະການ” ຂອງ ແຕ່ລະຂະແໜງການ, ສໍາລັບລົດຮັບໃຊ້ໂຄງການ ແລະ ວິສາຫະກິດ ຕ້ອງຕິດແຜ່ນກາໝາຍນຳໃຊ້ທີ່ລະບູຊື່ໂຄງການ ຫລື ລັດວິສາຫະກິດ ໂດຍໃຫ້ຕິດໃສ່ປະຕູເບື່ອງໜ້າທັງສອງດ້ານ.
ໂອກາດນີ້ ສະຫາຍ ເພັດຖາວອນ ພິລາວັນ ໄດ້ເນັ້ນໃຫ້ພະນັກງານທົ່ວຫ້ອງວ່າການສູນກາງພັກ ໃຫ້ເອົາໃຈໃສ່ປະຕິບັດດຳລັດດັ່ງກ່າວ ໃຫ້ຖືກຕ້ອງຕາມລະບຽບການ ເພື່ອໃຫ້ການນຳໃຊ້ລົດບໍລິຫານລັດ ໃຫ້ມີປະສິທິຜົນສູງ, ພ້ອມທັງສ້າງຄວາມເປັນເອກະພາບໃນການຈັດຕັ້ງປະຕິບັດຕົວຈິງ ພາຍໃນຫ້ອງວ່າການສູນກາງພັກ.
ພ້ອມກັນນີ້, ທ່ານ ທອງລະລິດ ມັງໜໍ່ເມກ ຫົວໜ້າຫ້ອງວ່າການສູນກາງພັກ ກໍໄດ້ເຂົ້າຮ່ວມເປັນສັກຂີພິຍານໃນໂອກາດ ປະກາດການນຳໃຊ້ສະຕິກເກີ ຕິດລົດທາງລັດຖະການ ໃນຄັ້ງນີ້ດ້ວຍ.
ຂ່າວ-ພາບ: ຫ້ອງວ່າການສູນກາງພັກ
#Medialaos MMD
