ໃນວັນທີ 12 ສິຫາ 2022 ຜ່ານມານີ້ ທ່ານ ປອ ໂພໄຊ ໄຊຍະສອນ ເຈົ້າແຂວງໆສາລະວັນໄດ້ລົງເຄື່ອນໄຫວຕິດຕາມຊຸກຍູ້ໂຄງການຟື້ນຟູ ກໍ່ສ້າງສ້ອມແປງຊົນລະປະທານ ດົງມອນ ຢູ່ເມືອງວ່າປີ ພ້ອມດ້ວຍຄະນະນຳຈາກຂະແໜງການທີ່ກ່ຽວຂ້ອງຂັ້ນແຂວງ, ເມືອງ, ວິຊາການ ແລະບໍລິສັດຮັບເໜົາກໍ່ສ້າງເຂົ້າຮ່ວມ
ໂຄງການຟື້ນພູ-ກໍ່ສ້າງສ້ອມແປງຊົນລະປະທານດົງມອນ ເມືອງວາປີ ກໍ່ແມ່ນໂຄງການໜຶ່ງທີ່ໄດ້ຮັບທຶນກູ້ຢືມຈາກທະນະຄານພັດທະນາອາຊີ, ໂຄງການຊົນລະປະທານແຫ່ງນີ້ປະກອບມີລະບົບຫົວງານແບບຝາຍນໍ້າລົ້ນ 3 ແຫ່ງ, ໃນນັ້ນກໍ່ສ້າງໃໝ່ 2 ແຫ່ງ ແລະປະຕູນຳໜຶ່ງແຫ່ງ, ລະບົບຄອງເໜື່ອງເຮົດດ້ວຍເບຕົງເສີມເຫຼັກ, ມີຈຳນວນ 6 ເສັ້ນຍາວ 15.040 ແມັດ, ໂຄງການດັ່ງກ່າວນີ້ຖ້າຫາກວ່າສ້າງສຳເລັດສາມາດຫົດເນື້ອທີ່ການຜະລິດຕາມການອອກແບບໃນລະດູແລ້ງໄດ້ 1 ພັນເຮັກຕາ ແລະລະດູຝົນ ໄດ້ 1.250 ເຮັກຕາ ແລະມີບ້ານທີ່ໄດ້ຮັບຜົນປະໂຫຍດຈາກໂຄງການດັ່ງກ່າວຈຳນວນ 10 ບ້ານ, ມີ 315 ຄອບຄົວຄື: ບ້ານ ພະນາຍ, ບ້ານ ດົງມອນ, ບ້ານ ໜອງບົວ, ບ້ານ ໜອງໂພ, ບ້ານ ພູມສະຫວັນ, ບ້ານ ສຸລິຍະ, ບ້ານ ສະເໜ້ຍ, ບ້ານ ເລົ້າ, ບ້ານ ຫາດ ແລະບ້ານສຸດທິ
ໂຄງການນີ້ໄດ້ເຊັນສັນຍາໃນວັນທີ 6 ສິງຫາ 2021 ແລະໄດ້ລົງມືຈັດຕັ້ງປະຕິບັດ ໃນວັນທີ 1 ກັນຍາ 2021, ເຊິ່ງແມ່ນບໍລິສັດ ວິສາຫະກິດສ່ວນບຸກຄົນ ເພັດຖາວອນ ເປັນຜູ້ຮັບເໜົກໍ່ສ້າງ ໃນມູນຄ່າສັນຍາ 2,419,998.00 ໂດລາສະຫະລັດ ໄລຍະເວລາການກໍ່ສ້າງໃຫ້ສຳເລັດແມ່ນ 18 ເດຶອນ, ໜ້າວຽກທີ່ໄດ້ຈັດຕັ້ງປະຕິບັດມີຄື: ກໍ່ສ້າງຄອງເໜືອງ Mc ເຮັດດ້ວຍເບຕົງເສີມເຫຼັກຍາວ 5.430 ແມັດ, ປະຕິບັດໄດ້ 3.045 ແມັດເທົ່າກັບ 47%, ກໍ່ສ້າງຄອງເໜືອງ Mc1 ເຮັດດ້ວຍເບຕົງເສີມເຫຼັກຄວາມຍາວ 4.500 ແມັດ, ໄດ້ປະຕິບັດສຳເລັດວຽກງບຸກເບີກຄອງເໜືອງ , ວຽກຂຸດດິນ ຕັດດິນ 50% ລະວຽກຖົມຄອງ 30%, ຄອງເໜືອງ Mc2 ກໍ່ແມ່ນເຮັດດ້ວຍເບຕົງເສີມເຫຼັກຄືກັນມີຄວາມຍາວ 1.730 ແມັດ, ໄດ້ປະຕິບັດສຳເລັດວຽກບຸກເບີກຄອງເໜືອງ ແລະ ວຽກຂຸດດິນ ຕັດດິນປະຕິບັດໄດ້ 40%, ມາຮອດປະຈຸບັນຄວາມຄືບໜ້າວຽກປະຕິບັດໄດ້ທັງໝົດ 27,59%, ຕາມການປະເມີນດ້ານວິຊາການເຫັນວ່າແມ່ນມີຄວາມຊັກຊ້າ, ສາຍເຫດເນືອງຈາກວ່າຝົນຕົກລິນຫຼາຍວັນບໍ່ສາ ມາດເຮັດວຽກຖົມດິນໄດ້, ສາມາດເຮັດໄດ້ແຕ່ເທເບຕົງຄອງເໜືອງ, ບຸກເບີກແລວຄອງເໜືອງ ແລະການນຳເອົາວັດສະດຸເຂົ້າສະໜາມໃນເບື່ອງຕົ້ນບໍ່ຕໍ່ເນື່ອງ, ແຮງງານກຳມະກອນເຮັດວຽກບໍ່ພຽງພໍກັບໜ້າວຽກ ແລະບໍ່ສາມາດເຮັດວຽກໄດ້ຫຼາຍໜ້າວຽກເນື່ອງຈາກສະພາບການລະບາດຂອງພະຍາດໂຄວິດ 19 ໃນໄລຍະຜ່ານມາ ແລະລາຄາວັດສະດຸ, ນໍ້າມັນເພີ້ມຂື້ນ, ນອກຈາກນັ້ນແບບກໍ່ສ້າງບໍ່ແທດເໜາະກັບສະພາບຕົວຈິງໄດ້ມີການສຳຫຼວດແຕ້ມແບບຄືນໃໝ່
ຈາກນັ້ນທ່ານ ເຈົ້າແຂວງສາລະວັນ ກໍ່ໄດ້ມີຄຳເຫັນເນັ້ນໃຫ້ພະນັກງານວິຊາການພາກລັດ-ເອກະຊົນເພີ້ມຄວາມຮັບຜິດຊອບໃນທຸກຂັ້ນຕອນຂອງການດຳເນີນການກໍ່ສ້າງໃຫ້ໄດ້ຄຸນນະພາບຖືກຕ້ອງຕາມເຕັກນິກ, ໃຫ້ມີການລາຍງານເປັນໄລຍະໃນການຈັດຕັ້ງປະຕິບັດວ່າມີຄວາມຫຍຸ້ງຍາກແນວໃດເພື່ອຊອກຫາທາງອອກ, ນອກນັ້ນກໍ່ຕ້ອງເອົາໃຈໃສ່ໃນການຕ້ານແລ້ງ, ຕ້ານຖວ້ມເພາະວ່າໃນໄລຍະນີ້ກໍ່ເປັນໄລຍະລະດູຝົນ ແລະ ຕ້ອງໄດ້ມີການໂຄສະນາແຈ້ງເຕືອນຕະຫຼອດເພື່ອໃຫ້ພໍ່ແມ່ປະຊາຊົນມີຄວາມກຽມພ້ອມຕະຫຼອດເວລາຫຼີກລ້ຽງຈາກຜົນເສຍຫາຍດັ່ງກ່າວໃຫ້ມີໜ້ອຍທີ່ສຸດ ແລະຕ້ອງເອົາໃຈໃສ່ສຸ້ມໃສ່ຕ້ານພະຍາດລະບາດຕາມລະດຸການ, ສິງສຳຄັນຕ້ອງໃຫ້ປະຊາຊົນມີສ່ວນຮ່ວມໃນຂະບວນການດັ່ງກ່າວ.
ພາບ-ຂ່າວ: ສິດຕາ ເພັດວົງສາ
#Medialaos MMD
