ໃນຕອນເຊົ້າວັນທີ 15 ສິງຫາ 2022 ນີ້, ກົມໃຫຍ່ພະລາທິການກອງທັບ, ໄດ້ຈັດຕັ້ງພິທີປະກາດໃຫ້ພະນັກງານນາຍທະຫານຢູ່ກົມໃຫຍ່ພະລາທິການກອງທັບພັກການ ເພື່ອກຽມເຂົ້າຮັບເບ້ຍບໍານານ ແລະ ພ້ອມທັງປະກາດຍົກຍ້າຍ, ແຕ່ງຕັ້ງຂັ້ນຫົວໜ້າກົມ, ຮອງກົມນ້ອຍ, ຫ້ອງການທີ່ຂື້ນກັບກົມໃຫຍ່ພະລາທິການກອງທັບ, ໂດຍເປັນກຽດເຂົ້າຮ່ວມເປັນປະທານຂອງສະຫາຍພົນຕີ ຄໍາເພັດ ສີຊານົນ ຫົວໜ້າກົມໃຫຍ່ພະລາທິການກອງທັບ, ມີຄະນະນໍາກົມໃຫຍ່ພະລາທິການ, ບັນດາກົມ, ຫ້ອງການ, ພະແນກການ, ຄະນະພັກ-ຄະນະບັນຊາກົມກອງອ້ອມຂ້າງ ແລະ ວິຊາການທີ່ີກ່ຽວຂ້ອງເຂົ້າຮ່ວມ.
ໃນພິທີ, ສະຫາຍພັນເອກຕີເບດ ສີແພງຄູນ ຫົວໜ້າຫ້ອງການເມືອງກົມໃຫຍ່ພະລາທິການກອງທັບ, ໄດ້ຂື້ນຜ່ານຂໍ້ຕົກລົງວ່າດ້ວຍການອະນຸຍາດໃຫ້ນາຍທະຫານຢູ່ກົມໃຫຍ່ພະລາທິການກອງທັບ ພັກການ ເພື່ອກຽມຮັບເບ້ຍບໍານານ ຈໍານວນ 2 ສະຫາຍ, ກະຊວງປ້ອງກັນປະເທດຕົກລົງ, ອະນຸຍາດໃຫ້ ພົນຈັດຕະວາ ບຸນແຍງ ວິໄລສົມ ຫົວໜ້າກົມອຸປະໂພກ-ບໍລິໂພກ ແລະ ພັນເອກ ຄໍາຜາຍ ຜັ່ນສິລິ ຮອງຫົວໜ້າກົມເສນາຮັກກົມໃຫຍ່ພະລາທິການກອງທັບ ພັກການກຽມເຂົ້າຮັບເບ້ຍບໍານານ, ພ້ອມທັງຜ່ານຂໍ້ຕົກລົງ, ຍົກຍ້າຍນາຍທະຫານຢູ່ກົມໃຫຍ່ພະລາທິການກອງທັບ, ອີງຕາມກົດໝາຍນາຍທະຫານກອງທັບປະຊາຊົນລາວ ( ສະບັບປັບປຸງ ) ໃນພາກທີ II ໝວດທີ 4 ມາດຕາ 26 ວ່າດ້ວຍການແຕ່ງຕັ້ງ, ຍົກຍ້າຍນາຍທະຫານ, ອີງຕາມການນໍາສະເໜີຂອງກົມໃຫຍ່ພະລາທິການກອງທັບ ສະບັບເລກທີ 353 ລົງວັນທີ 27 ມິຖຸນາ 2022 ແລະ ອີງຕາມ ການຕົກລົງເປັນເອກະພາບຂອງກອງປະຊຸມຄະນະປະຈໍາພັກກະຊວງປ້ອງກັນປະເທດໃນຄັ້ງວັນທີ 15 ກໍລະກົດ 2022, ອີງຕາມ ການຄົ້ນຄົ້ວາ ແລະ ນໍາສະເໜີຂອງກົມໃຫຍ່ການເມືອງກອງທັບ, ກະຊວງປ້ອງກັນປະເທດຕົກລົງ, ຍົກຍ້າຍພົນຈັດຕະວາ ວົງສັກ ສີພັນດອນ ຫົວໜ້າກົມກໍ່ສ້າງ-ຄຸ້ມຄອງຊັບສິນ ຜູ້ເກົ່າໄປໃຫ້ຫ້ອງການກົມໃຫຍ່ພະລາທິການກອງທັບ, ແຕ່ງຕັ້ງ ພັນເອກ ສົມໃຈ ຄໍາມະນີ ເປັນຫົວໜ້າກົມກໍ່ສ້າງ-ຄຸ້ມຄອງຊັບສິນກົມໃຫຍ່ພະລາທິການກອງທັບ ຜູ້ໃໝ່, ສະຫາຍ ພັນເອກ ສອນໄຊ ວົງພະຈັນ ເປັນຫົວໜ້າກົມອຸປະໂພກ-ບໍລິໂພກກົມໃຫຍ່ພະລາທິການກອງທັບຜູ້ໃໝ່, ພັນໂທ ວິໄລ ສຸກກອງມີ ເປັນຮອງກົມກໍ່ສ້າງ-ຄຸ້ມຄອງຊັບສິນ ແລະ ແຕ່ງຕັ້ງພັນໂທ ເຄນທອງ ພັດທະນະຄໍາ ເປັນຮອງກົມເສນາຮັກກົມໃຫຍ່ພະລາທິການກອງທັບ.
ໂດຍ: ຄໍາປະສົງ ລາດຊະວົງ.
