ກອງປະຊຸມກວດກາການກໍ່ສ້າງ ໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2021 – 2022 ແລະ ວາງທິດທາງແຜນການ ຄາດໝາຍສູ້ຊົນ ໃນປີຕໍ່ໜ້າຂອງກອງພົນທີ2 ໄດ້ຈັດຂຶ້ນໃນຫວ່າງບໍ່ດົນຜ່ານມາ, ໂດຍການເປັນປະທານ ຂອງສະຫາຍ ພົນຈັດຕະວາ ວຽງແກ້ວ ສີສຸລາດ ເລຂາຄະນະພັກ ຫົວໜ້າການເມືອງກອງພົນທີ 2, ມີຄະນະພັກ – ຄະນະບັນຊາກອງພົນ, ອົງການ, ພະແນກການທີ່ກ່ຽວຂ້ອງ ແລະ ອະນຸກໍາມະການກວດກາ ເຂົ້າຮ່ວມ.
ອີງຕາມຄໍາສັ່ງແນະນໍາ ຂອງຄະນະພັກ ກະຊວງປ້ອງກັນປະເທດ ສະບັບເລກທີ 2622 /ຄພກປທ, ລົງວັນທີ 13 / 07 / 2018 ວ່າດ້ວຍການເພີ່ມທະວີກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃນທົ່ວກອງທັບ ເພື່ອໃຫ້ພະນັກງານ – ນັກຮົບເຂົ້າໃຈເຊື່ອມຊຶມ ຕໍ່ແນວທາງແຜນນະໂຍບາຍຂອງພັກ – ລັດ, ກົດລະບຽບຂອງພັກ, ຂອງກອງທັບເວົ້າລວມ, ເວົ້າສະເພາະແມ່ນ 5 ມາດຖານການສ້າງນັກຮົບວັດທະນະທໍາ ຕິດພັນກັບການຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານ ທີ່ກະຊວງປ້ອງກັນປະເທດວາງອອກ, ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງສູນກາງພັກ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງປ້ອງກັນປະເທດ ແລະ ມະຕິກອງປະຊຸມ ຄັ້ງທີ VI ຂອງຄະນະພັກກອງພົນໃຫ້ປະກົດຜົນເປັນຈິງ . ສະຫາຍພັນຕີ ສົມຈິດ ແກ້ວໄຊຍະວົງ ຫົວໜ້າພະແນກຈັດຕັ້ງພັກ ໄດ້ຕີລາຄາຄຸນນະພາບ ຂອງສະມາຊິກພັກ, ໜ່ວຍພັກ ທົ່ວກອງພົນ ເພື່ອແນ່ໃສ່ ປັບປຸງກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ກາຍເປັນກົມກອງວັດທະນະທໍາ, ກອງ 3 ປອດ, ຊາວໜຸ່ມ 4 ບຸກ, ແມ່ຍິງ 3 ດີ ເຮັດໃຫ້ກົມກອງ ກາຍເປັນກົມກອງຕົວແບບ, ເປັນບ່ອນເຕົ້າໂຮມ ຄວາມສາມັກຄີພາຍໃນ ແລະ ພາຍນອກ ໃຫ້ເປັນປຶກແຜ່ນ, ມີທັດສະນະຫຼັກໝັ້ນ ຕໍ່ການນໍາພາຂອງພັກຕາມ 5 ຫຼັກການ 3 ທິດນໍາໃນການກໍ່ສ້າງພັກ ເຮັດໃຫ້ພະນັກງານ – ນັກຮົບ ມີຄຸນທາດການເມືອງໜັກແໜ້ນ, ມີແນວຄິດຫຼັກໝັ້ນ ແລະ ມີຄວາມເຂັ້ມແຂງທາງດ້ານການຈັດຕັ້ງ, ສ້າງແບບແຜນວິທີນໍາພາ ຢ່າງຖືກຕ້ອງຕາມຫຼັກການລວມສູນປະຊາທິປະໄຕ. ປັດຈຸບັນໃນທົ່ວກອງພົນທີ 2 ມີໜ່ວຍພັກທັງໝົດ 111 ໜ່ວຍພັກ, ໃນນັ້ນໄດ້ນໍາສະເໜີ ຄົ້ນຄວ້າ ຈໍານວນ 70 ໜ່ວຍພັກ ແລະ ຮັບຮອງເອົາເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ. ສະເໜີຮັບຮອງເອົາຄັ້ງທີ 4 ຈໍານວນ 20 ໜ່ວຍພັກ, ຄັ້ງທີ 3 ຈໍານວນ 16 ໜ່ວຍພັກ, ຄັ້ງທີ 2 ຈໍານວນ 25 ໜ່ວຍພັກ ແລະ ສະເໜີຮັບຮອງເອົາຄັ້ງທີ 1 ຈໍານວນ 09 ໜ່ວຍພັກໜ່ວຍພັກ ເທົ່າກັບ 63,06 % ແລະ ຍັງໄດ້ຄົ້ນຄວ້າເປົ້າໝາຍໃໝ່ ທີ່ຈະສ້າງ ໃນປີ 2023 ຈໍານວນໜຶ່ງ.
ໂອກາດນີ້, ສະຫາຍພົນຈັດຕະວາ ວຽງແກ້ວ ສີສຸລາດ ເລຂາຄະນະພັກ ຫົວໜ້າການເມືອງກອງພົນທີ 2, ກໍ່ໄດ້ຮຽກຮ້ອງໃຫ້ອານຸກໍາມະການແຕ່ລະສະຫາຍ ຈົ່ງສືບຕໍ່ຊຸກຍູ້ຂະບວນການດັ່ງກ່າວ ຢູ່ບັນດາອົງການ, ກົມກອງ ໃຫ້ດີກວ່າເກົ່າ, ເພື່ອແນ່ໃສ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ສ້າງນັກຮົບວັດທະນະທໍາ, ກົມກອງວັດທະນະທໍາ.
ໂດຍ: ຄໍາຮັກ ໄຊວັນທອນ
