ຮ່ອງຄວາມກົດດັນອາກາດຕ່ຳ ໄດ້ພາດຜ່ານພາກເໜືອຂອງປະເທດລາວ, ສົມທົບກັບລົມມໍລະສຸມຕາເວັນຕົກສຽງໃຕ້ພັດປົກຄຸມເປັນສ່ວນໃຫຍ່, ຊຶ່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫລື້ອມ ໃນລະດັບຄ່ອຍ ແລະ ຕົກປານກາງ ພ້ອມມີລົມພັດແຮງ ຢູ່ບາງທ້ອງຖິ່ນໃນແຕ່ລະພາກ.
ສໍາລັບຂໍ້ມູນອຸຕຸກະເສດປະຈໍາອາທິດນີ້ ໃຫ້ກະສີກອນຄວນເອົາໃຈໃສ່ຕິດຕາມ ແລະ ເພີ່ມທະວີການນໍາໃຊ້ມາດຕະການທີ່ເໜາະສົມ ສໍາລັບ ພະຍາດໃບໄໜ, ພະຍາດກາບໃບແຫ້ງ, ເພ້ຍຈັກຈັ່ນສີນ້ໍາຕານ, ພະຍາດໃບຈຸດສີນ້ໍາຕານ ທີ່ມີຄວາມສ່ຽງຢູ່ລະດັບສູງ, ບົ້ງຫໍ່ລໍາຕົວ, ແມງບົວທີ່ມີຄວາມສ່ຽງລະດັບປານກາງ ເພື່ອປ້ອງກັນແມງໄມ້ ແລະ ພະຍາດຈາກເຊື້ອລາ ໃຫ້ໃຊ້ສະໝຸນໄພ, ຢາປາບສັດຕູພືດ ແລະ ຢາຂ້າເຊື້ອລາປະສົມກັບເພື່ອຫລຸດຜ່ອນການທຳລາຍ ແລະ ແພ່ລະບາດ.
