ແຫລ່ງຂ່າວຈາກ ແຂວງຈຳປາສັກ ໃຫ້ຮູ້ວ່າ: ວັນທີ 15 ສິງຫາ 2022 ນີ້, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ຕ້ອນຮັບ ທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້ ພ້ອມດ້ວຍຄະນະ ເພື່ອແຈ້ງຈຸດປະສົງຂອງການມາເຄື່ອນໄຫວວຽກງານ ເພື່ອຊຸກຍູ້ ຕິດຕາມການຈັດຕັ້ງປະຕິບັດວາລະແຫ່ງຊາດ ທີ່ຕິດພັນກັບຂົງເຂດວຽກງານກະສິກໍາ ແລະ ປ່າໄມ້, ການຈັດສັນຄຸ້ມຄອງທີ່ດິນ ເພື່ອພັດທະ ນາກະສິກຳ ແລະ ຊຸກຍູ້ການລົງທຶນກ່ຽວກັບພືດກະສິກຳ ເປັນສິນຄ້າ ຢູ່ແຂວງຈຳປາສັກ.
ໂອກາດນີ້, ທ່ານ ວິໄລວົງ ບຸດດາຄຳ ກໍໄດ້ລາຍງານໃຫ້ທ່ານລັດຖະມົນຕີກະຊວງກະສິກໍາ ແລະ ປ່າໄມ້ ພ້ອມດ້ວຍຄະນະ ຮູ້ເຖິງການພັດທະນາເສດເຖະກິດ-ສັງຄົມຂອງແຂວງ ໂດຍໄດ້ສຸມໃສ່ຜັນຂະຫຍາຍ ແລະ ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຢ່າງຕັ້ງໜ້າ; ຄຽງຄູ່ກັບການປົກປັກຮັກສາ, ຟື້ນຟູທຳມະຊາດ ແລະ ສິ່ງແວດລ້ອມ ໃຫ້ຍືນຍົງ ໂດຍການມີສ່ວນຮ່ວມຂອງປະຊາຊົນ; ປົກປັກຮັກສາ ແລະ ຄຸ້ມຄອງເນື້ອທີ່ດິນປ່າໄມ້ 1.062.648 ເຮັກຕາ, ກວມ 69,23% ຂອງເນື້ອທີ່ດິນປ່າໄມ້ທົ່ວແຂວງ, ອັດຕາການປົກຫຸ້ມປ່າໄມ້ ປະຕິບັດໄດ້ 68,51%, ທຽບໃສ່ເນື້ອທີ່ດິນປ່າໄມ້ ເທົ່າກັບ 727.972 ເຮັກ; ພື້ນຟູປ່າໄມ້ໄດ້ 352 ເຮັກ.
ພ້ອມນັ້ນ, ທ່ານເຈົ້າແຂວງຈຳປາສັກ ຍັງໄດ້ສະເໜີ ທ່ານລັດຖະມົນຕີກະຊວງກະສິກໍາ ແລະ ປ່າໄມ້ ຊ່ວຍຊຸກຍູ້ແຫລ່ງທຶນ ເພື່ອພັດທະນາ ແລະ ປົກປັກຮັກສາປ່າ-ເຂດຍອດນ້ຳ ຢູ່ເມືອງປາກຊ່ອງ ແຂວງຈຳປາສັກ ນຳອີກ.
ຂ່າວ: ທັດຊະນະ.
