ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ພົບປະພະນັກງານທະນາຄານຮ່ວມທຸລະກິດລາວ-ຫວຽດ ຈຳກັດ ສາຂາແຂວງຊຽງຂວາງ ເນື່ອງໃນໂອກາດວັນສ້າງຕັ້ງສາຂາ ຄົບຮອບ 10 ປີ.
ໃນໂອກາດດັ່ງກ່າວ, ທ່ານ ບູຍເຈືອງຢາງ ຫົວໜ້າທະນາຄານ ຮ່ວມທຸລະກິດ ລາວ – ຫວຽດ ຈໍາກັດ ສາຂາຊຽງຂວາງ ໄດ້ລາຍງານໂດຍຫຍໍ້ ຜົນການດຳເນີນທຸລະກິດ ແລະ ວຽກງານຊ່ວຍເຫຼືອສັງຄົມຂອງສາຂາຊຽງຂວາງໃນໄລຍະຜ່ານມາ. LaoVietBank ສາຂາຊຽງຂວາງ ເປັນໜຶ່ງໃນບັນດາທະນາຄານທຸລະກິດຢູ່ແຂວງຊຽງຂວາງ ທີ່ມີການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ, ປະກອບສ່ວນເຂົ້າງົບປະມານຂອງແຂວງເປັນປົກກະຕິ. ນອກຈາກວຽກງານວິຊາສະເພາະແລ້ວ, ສາຂາຍັງເອົາໃສ່ເປັນພິເສດຕໍ່ກັບວຽກງານຊ່ວຍເຫຼືອສັງຄົມ ຊຶ່ງໃນໄລຍະຜ່ານມາ ຫຼາຍຄັ້ງທີ່ສາຂາໄດ້ແບ່ງປັນນ້ຳໃຈຊ່ວຍເຫຼືອຜູ້ທຸກຍາກຢູ່ເຂດຊົນນະບົດຫ່າງໄກສອກຫຼີກ.
ທ່ານ ບຸນຈັນ ສີວົງພັນ ໄດ້ມີຄຳເຫັນພົບປະໂອ້ລົມກັບພະນັກງານ, ການນຳສາຂາ, ພ້ອມທັງຕີລາຄາສູງຕໍ່ກັບວຽກງານວິຊາສະເພາະ, ໝາກຜົນຂອງການດຳເນີນທຸລະກິດ ແລະ ການປະກອບສ່ວນຊ່ວຍເຫຼືອສັງຄົມຂອງ LaoVietBank ສາຂາຊຽງຂວາງໃນໄລຍະຜ່ານມາ. ເນື່ອງໃນໂອກາດວັນສ້າງຕັ້ງສາຂາ ຄົບຮອບ 10 ປີ ທ່ານເຈົ້າແຂວງຍັງອວຍພອນໃຫ້ສາຂານັບມື້ນັບພັດທະນາຍິ່ງໆຂຶ້ນ.
ໃນໂອກາດດັ່ງກ່າວນີ້, ທ່ານເຈົ້າແຂວງ ພ້ອມດ້ວຍຄະນະ ແລະ ພະນັກງານສາຂາ ຍັງໄດ້ໄປວາງພວງມາລາຢູ່ຕໍ່ອະນຸສາວະລີ ປະທານ ໄກສອນ ພົມວິຫານ ແລະ ອະນຸສາວະລີ ຮ່ວມສຳພັນ ນົກຮົບນິລະນາມ ລາວ – ຫວຽດນາມ ເພື່ອລະນຶກເຖິງຄຸນງາມຄວາມດີຂອງຜູ້ນໍາແສນເຄົາລົບຮັກ ແລະ ນັກຮົບປະຕິບັດ.
(ຂ່າວ: ທະນາຄານ ຮ່ວມທຸລະກິດ ລາວ – ຫວຽດ ຈໍາກັດ)
