ໃນມໍ່ໆ ນີ້, ສື່ມວນຊົນລາວ ກັບເວັບໄຊ www.yunnangateway.com/ ທີ່ຂຶ້ນກັບສູນການສື່ສານສາກົນພາກພື້ນອາຊີໃຕ້-ອາຊີອາຕາເວັນອອກສ່ຽງໃຕ້ແຂວງຢຸນນານ ຮ່ວມກັນດຳເນີນການສຳພາດຂ່າວກ່ຽວກັບທາງລົດໄຟລາວ-ຈີນ ທີ່ມີຫົວຂໍ້ວ່າສາຍແນນລະຫວ່າງລາວ-ຈີນ, ເສັ້ນທາງແຫ່ງຄວາມສຸກ” ໄລຍະທີສອງ. ຄະນະນັກຂ່າວລາວໄດ້ເດີນທາງໄປສຳພາດຢູ່ສະຖານີໄຟຟ້າ 230 ກິໂລໂວນ ປາກມອງ 2 ຕັ້ງຢູ່ເມືອງນໍ້າບາກ ແຂວງຫຼວງພະບາງ.
ສະຖານີໄຟຟ້າ 230 ກິໂລໂວນ ປາກມອງ 2 ມີເນື້ອທີ່ 9 ກວ່າເຮັກຕ້າ, ສ້າງຂຶ້ນໃນປີ 2014 ໃນມູນຄ່າການກໍ່ສ້າງປະມານ 30 ລ້ານໂດລາສະຫະລັດ ແລະ ເປີດນຳໃຊ້ໃນປີ 2015 ເຊິ່ງລັດວິສາຫະກິດໄຟຟ້າລາວເປັນເຈົ້າຂອງໂຄງການ, ຮັບ ເໝົາກໍ່ສ້າງໂດຍບໍລິສັດ ຕາຂ່າຍໄຟຟ້າພາກໃຕ້ຢຸນນານສາກົນ (CSG-YNIC) ປັດຈຸບັນນີ້ ກຳລັງສະໜອງໄຟຟ້າ ໃຫ້ແກ່ທາງລົດໄຟລາວ-ຈີນ ຕອນປະເທດລາວ ຢ່າງໝັ້ນຄົງ.ທ່ານ ທອນ ວົງພະຈັນ ຮອງພະແນກລະບົບສົ່ງພາກເໜືອຂອງລັດວິສາຫະກິດໄຟຟ້າລາວ ໄດ້ໃຫ້ຮູ້ວ່າ: ບົດບາດໜ້າທີ່ຂອງສະຖານີໄຟຟ້າ ປາກມອງ 2 ແມ່ນການຄຸ້ມຄອງບຳລຸງຮັກສາສາຍສົ່ງ 115 ກິໂລໂວນ ແລະ 230 ກິໂລໂວນ ເຊິ່ງມີຄວາມຍາວ 5,000 ກວ່າກິໂລແມັດ ແລະ ສະຖານີໄຟຟ້າແຮງສູງ 41 ແຫ່ງ ແລະ ພະນັກງານທີ່ເຮັດວຽກວິຊາສະເພາະຈຳນວນ 500 ກວ່າຄົນ ແມ່ນເປັນພະນັກງານຈາກລັດວິສາຫະກິດໄຟຟ້າລາວ.
ທ່ານ ທອນ ວົງພະຈັນ ໃຫ້ຮູ້ຕື່ມວ່າ: ສະຖານີໄຟຟ້າປາກມອງ 2 ຍັງບໍ່ສາມາດຮອງຮັບລະບົບ ເອັນລົບໜຶ່ງ (N-1) ເຊັ່ນ : ການລຳລຽງໄຟຟ້າທີ່ມີຄວາມສະຖຽນລະພາບເຕັມທີ່ ເພາະຖ້າໄຟຟ້າເກີດການຂັດຂ້ອງແບບສຸດວິໄສ ເປັນຕົ້ນແມ່ນ ຟ້າຜ່າ ໄດ້ສົ່ງຜົນກະທົບໂດຍກົງຕໍ່ການແລ່ນຂອງລົດໄຟລາວ-ຈີນ ແຕ່ຄະນະຮັບຜິດຊອບທີ່ກ່ຽວຂ້ອງກໍໄດ້ເລັ່ງແກ້ໄຂຢ່າງຮີບດ່ວນ, ຕໍ່ບັນຫາດັ່ງກ່າວ ທາງ ບໍລິສັດ ຕາຂ່າຍໄຟຟ້າພາກໃຕ້ ຢຸນນານສາກົນ ຮ່ວມກັບບໍລິສັດລົງທຶນພະລັງງານໄຟຟ້າລາວ-ຈີນ ແລະ ລັດວິສາຫະກິດໄຟຟ້າລາວ ຈະໄດ້ສ້າງລະບົບສາຍສົ່ງໄຟຟ້າແຮງສູງ 500 ກິໂລໂວນ ໃນມໍ່ໆ ນີ້ ທີ່ເມືອງນາໝໍ້ ແຂວງອຸດົມໄຊ ເພື່ອຮອງຮັບລະບົບການໄຫລວຽນຂອງພະລັງງານໄຟຟ້າໃຫ້ມີສະຖຽນລະພາບຢ່າງເຕັມທີ່ ແລະ ປະສິດທິພາບສູງເພື່ອແກ້ໄຂບັນຫາໄຟຟ້າຂັດຂ້ອງດັ່ງກ່າວ. ສຳລັບໂຄງການສະໜອງໄຟຟ້າໃຫ້ທາງລົດໄຟລາວ-ຈີນ ມີຄວາມຍາວທັງໝົດ 257 ກິໂລແມັດ, ມີຫລັກເສົາໄຟຟ້າທັງໝົດ 633 ຕົ້ນ, ສະໜອງພະລັງງານໄຟຟ້າໃຫ້ແກ່ສະຖານີລາກແກ່ທັງໝົດ 10 ສະຖານີ ຜ່ານ 4 ແຂວງ ແລະ 1 ນະຄອນຫລວງຄື: ແຂວງຫຼວງນໍ້າທາ, ແຂວງອຸດົມໄຊ, ແຂວງຫຼວງພະບາງ, ແຂວງວຽງຈັນ ແລະ ນະຄອນຫລວງວຽງຈັນ. ມາຮອດປະຈຸບັນນີ້ໂຄງການໄດ້ສະໜອງໄຟຟ້າໃຫ້ທ່າງລົດໄຟລາວ-ຈີນແລ້ວ 35 ລ້ານກວ່າກິໂລວັດໂມງ. ທ່ານ ຮວງເວິນກັງ ຜູ້ອຳນວຍການໃຫຍ່ ຂອງບໍລິສັດລົງທຶນພະລັງງານໄຟຟ້າລາວ-ຈີນ ຈຳກັດ ໄດ້ໃຫ້ຮູ້ວ່າ: ບໍລິສັດລົງທຶນພະລັງງານໄຟຟ້າລາວ-ຈີນ ຈຳກັດ ແມ່ນຮ່ວມລົງທຶນສ້າງຂຶ້ນໂດຍບໍລິສັດຕາຂ່າຍໄຟຟ້າພາກໃຕ້ຈີນ ຢຸນນານສາກົນ (CSG-YNIC) ກັບລັດວິສາຫະກິດໄຟຟ້າລາວ(EDL), ພາລະໜ້າທີຕົ້ນຕໍ ຂອງບໍລິສັດແມ່ນສະໜອງໄຟຟ້າໃຫ້ແກ່ທາງລົດໄຟລາວ-ຈີນຕອນປະເທດລາວ. ທ່ານ ຮວງເວິນກັງ ໃຫ້ຮູ້ຕື່ມວ່າ: ຈຸດພິເສດ ສະຖານີໄຟຟ້າ ປາກມອງ 2 ແມ່ນຕັ້ງຢູ່ໃຈກາງລະຫວ່າງການສົ່ງຕໍ່ຕາຂ່າຍໄຟຟ້າໃນເຂດພາກເໜືອຂອງ ສປປ ລາວ ເຊິ່ງ ເປັນ ໂຄງການສາທິດດ້ານວິສາວະກຳແຫ່ງປະເທດລາວ ກໍຄືເປັນ ສ່ວນປະກອບສຳຄັນຂອງ ໂຄງການສາຍສົ່ງໄຟຟ້າ 230 ກິໂລວັດ ໃນເຂດພາກເໜືອຂອງລາວ ພ້ອມທັງເປັນພາກສ່ວນໜຶ່ງຂອງໂຄງການສະໜອງໄຟຟ້າໃຫ້ທາງລົດໄຟລາວ-ຈີນ, ໃນນາມທີ່ປາມອນປານີກັບສອງໂຄງການທີ່ສຳຄັນດັ່ງກ່າວນີ້ ຈຶ່ງໄດ້ເປັນສັກຂີພິຍານ ໃຫ້ເຫັນເຖິງການຮ່ວມມືດ້ານພະລັງໄຟຟ້າລະຫວ່າງສອງຊາດລາວ-ຈີນຳມີການລົງເລິກຍິ່ງໆຂຶ້ນ, ພ້ອມທັງເປັນເງົາສະທ້ອນທີ່ສອງຊາດລາວ-ຈີນ ຮ່ວມກັນສ້າງຄູ່ຮ່ວມຊາຕາກຳລາວ-ຈີນ ໃນດ້ານຂົງເຂດພະລັງງານໄຟຟ້າ.
ຕາມທີ່ໃຫ້ຮູ້ວ່າ ຕາຂ່າຍໄຟຟ້າພາກໃຕ້ຈີນ ຢຸນນານສາກົນ ໄດ້ດຳເນີນການລົງທຶນຢູ່ລາວຫຼາຍປີແລ້ວ ພ້ອມທັງໄດ້ຮັບຜົນສຳເລັດຢ່າງພົ້ນເດັ່ນ. ຫວ່າງບໍ່ດົນມານີ້ຕາຂ່າຍໄຟຟ້າລາວໄດ້ເຊື່ອມຕໍ່ກັບຕາຂ່າຍໄຟຟ້າ ກິ່ງແຂວງປົກຄອງຕົນເອງ ເຜົ່າລື້ສິບສອງພັນນາ ແຂວງຢຸນນານ ໂດຍຜ່ານສາຍສົ່ງໄຟຟ້າ 115 ກິໂລໂວນສາຍ ຕົງເມີນ-ນາໝໍ້ ເຊິ່ງໝາຍຄວາມວ່າ, ສອງປະເທດລາວ-ຈີນ ໄດ້ເປີດການຄ້າໄຟຟ້າເຊິ່ງກັນ ແລະ ກັນຢ່າງເປັນທາງການ.
ປັດຈຸປັນນີ້ ລັດວິສາຫະກິດໄຟຟ້າລາວ ກັບບໍລິສັດຕາຂ່າຍໄຟຟ້າພາກໃຕ້ຈີນ (CSG) ກຳລັງຊູກຍູ້ໂຄງການເຊື່ອມຕໍ່ສາຍສົ່ງໄຟຟ້າ 500 ກິໂລໂວນກັບຝ່າຍລາວ, ເພື່ອຮອງຮັບລະບົບການໄຫລວຽນຂອງພະລັງງານໄຟຟ້າໃຫ້ເຕັມທີ່. ໂດຍຜ່ານຈາກການເພີ່ມທະວີການເຊື່ອມໂຍງເຊື່ອມຈອດກັນສົ່ງໄຟຟ້າດ້ວຍຄວາມແຮງສູງກວ່າ ແລະ ເພີ່ມທະວີກາຊ່ວຍຊູຍູ້ໜູນກັນດ້ານທ່າແຮງດ້ານພະລັງງານຂອງສອງປະເທດ ເພື່ອຊຸກຍູ້ການນຳໃຊ້ພະລັງງານສະອາດລະຫວ່າງເຂດແຄວ້ນຕ່າງໆ ໃຫ້ໄດ້ດີກວ່າເກົ່າ.
