ວຽກງານຖະແຫລງຂ່າວ-ສື່ມວນຊົນ ໄດ້ສະໜິດຕິດແໜ້ນ ກັບພາລະກິດປະຕິວັດຂອງພັກ, ຕິດພັນກັບກັບ ຂະບວນການຕໍ່ສູ້ ຂອງປະຊາຊົນ ບັນດາເຜົ່າ ແລະ ຕິດພັນກັບ ຄວາມເປັນມາ ຂອງຊາດລາວເຮົາ; ດັ່ງນັ້ນ ພັກເຮົາຈຶ່ງໄດ້ກຳນົດມະຕິ ແນວທາງ, ທັງຊີ້ນຳໆພາຕໍ່ຂົງເຂດສື່ມວນຊົນ ໃຫ້ເຄື່ອນໄຫວຢ່າງສອດຄ່ອງກັບແຕ່ລະໄລຍະຂອງການປະຕິວັດເຮົາ.
ນັບແຕ່ມື້ທີ່ມີມະຕິ ຂອງກົມການເມືອງ ສູນກາງພັກ ເລກທີ 36, ລົງວັນທີ 19 ມິຖຸນາ 1993 ເປັນຕົ້ນມາ; ວຽກງານສື່ມວນຊົນ ຂອງລາວເຮົາ ໄດດ້ມີບາດກ້າວຂະຫຍາຍຕົວ ແລະ ຜົນສຳເລັດຫລາຍດ້ານ. ສື່ມວນຊົນ ໄດ້ປະກອບສ່ວນ ສຳຄັນເຂົ້າໃນການ ກໍ່ສ້າງລະບອບໃໝ່; ປະກອບ ສ່ວນ ຍົກລະດັບ ຄວາມຮັບຮູ້ ຂອງປະຊາຊົນ, ຕອບສະໜອງ ຄວາມຮຽກຮ້ອງ ຕ້ອງການທີ່ນັບມື້ສູງ ແລະ ກ້າວສູ່ຄວາມອຸດົມສົມບູນ ທາງດ້ານເນື້ອໃນ ແລະ ຄຸນນະພາບ. ຜ່ານການເປີດກວ້າງ ຂ່າວສານຕໍ່ຕ່າງປະເທດ, ສື່ມວນຊົນລາວ ກໍ່ໄດ້ປະກອບສ່ວນ ອັນສຳຄັນເຂົ້າໃນການ ປະຕິບັດແນວທາງ ການຕ່າງປະເທດ ຂອງພັກ-ລັດ ເຮັດໃຫ້ເພື່ອນມິດ ສາກົນຮູ້ຈັກຊາດລາວ, ຄົນລາວ ຫລາຍຂຶ້ນຊັກໄຊ້, ບົດບາດ ແລະ ອິດທິພົນຂອງ ສປປ ລາວ ກໍ່ນັບມື້ພົ້ນເດັ່ນ ໃນເວທີພາກພື້ນ ແລະ ສາກົນ.
ໃນໄລຍະຊຸມປີມໍ່ໆມານີ້, ວຽກງານຖະແຫລງຂ່າວ ສື່ມວນຊົນ ຍິ່ງໄດ້ຮັບການພັດທະນາ ແລະ ເຕີບໃຫຍ່ຂະຫຍາຍ ທາງດ້ານປະລິມານ ແລະ ຄຸນນະພາບ; ສືບຕໍ່ເປັນກະບອກສຽງ ອັນແຫລມຄົມ ຂອງພັກ-ລັດ, ນຳ ເອົາເນື້ອໃນ ແນວທາງນະໂຍບາຍ ໃນທຸກຂົງເຂດວຽກງານ ລົງສູ່ປະຊາຊົນ ແລະ ສ່ອງແສງ ການຈັດຕັ້ງປະຕິບັດ ແຜນນະໂຍບາຍ, ລະບຽບກົດໝາຍຕ່າງໆ ຕໍ່ພາຍໃນ ແລະ ຕ່າງປະເທດ ຢ່າງມີຜົນສຳເລັດ.
ເຖິງຢ່າງໃດກໍ່ຕາມ, ເພື່ອຕອບສະໜອງກັບຄວາມຮຽກຮ້ອງຕ້ອງການໃນໄລຍະໃໝ່; ສື່ມວນຊົນລາວຂອງພວກເຮົາ ຈະຕ້ອງໄດ້ສືບຕໍ່ ເຊີດຊູມູນເຊື້ອ ອັນດີງາມ ທີ່ສື່ມວນຊົນຮຸ້ນກ່ອນ ໄດ້ສ້າງເອົາໄວ້ ແລະ ເສີມຂະຫຍາຍໃຫ້ດີ ຂຶ້ນໄປເລື້ອຍ, ບັນດາເນື້ອໃນ ໃຫ້ຮັບປະກັນໄດ້ ລັກສະນະຕົວຈິງ, ລັກສະນະສຶກສາອົບຮົມ, ລັກສະນະຊີ້ນຳ ແລະ ລັກສະນະຕໍ່ສູ້ ເຊິ່ງໄດ້ກຳນົດໄວ້ ໃນກົດໝາຍສື່ມວນຊົນ; ເປັນກະບອກສຽງ ຂອງພັກ, ລັດ ແລະ ຮັບໃຊ້ປະເທດຊາດ ແລະ ປະຊາຊົນ ໂດຍແທ້ຈິງ ດ້ວຍຫລາຍຮູບຫລາຍສີ ແຫລມຄົມ, ອຸດົມສົມບູນ.
ໃນໄລຍະໃໝ່ນີ້, ວຽກງານຂ່າວສານ ສື່ມວນຊົນ ມີຄວາມຈຳເປັນພາວະວິໄສ ທີ່ຈະຕ້ອງໄດ້ຮັບການ ພັດທະນາ ແລະ ຍົກລະດັບ ໃຫ້ມີຄຸນນະພາບອັນໃໝ່ ເຊິ່ງມັນມີຄວາມຈຳເປັນ ທັງທາງດ້ານການລົງທຶນ ລົງຮອນພັດທະນາ ບັນດາປັດໄຈ ທີ່ເປັນພື້ນຖານ ເຕັກນິກ ອຸປະກອນທັນສະໄໝ, ກໍ່ສ້າງຍົກລະດັບ ບຸກຄະລາກອນ ໃຫ້ມີຄຸນທາດການເມືອງ, ຄຸນສົມບັດສິນທຳປະຕິວັດ ແລະ ຄວາມຮູ້-ຄວາມສາມາດ ກ້າວສູ່ມາດຕະຖານ ພາກພື້ນ-ສາກົນ, ປະຕິບັດວຽກງານ ຢ່າງມີຫົວຄິດປະດິດສ້າງ ແລະ ມີແບບແຜນວິທີ ເຮັດວຽກອັນໃໝ່; ລັດມີລະບອບນະໂຍບາຍ ສະຫວັດດີການ ຄ່າຕອບແທນອັນເໝາະສົມ ກັບການດຳລົງຊີວິດ ເພື່ອເຮັດແນວໃດໃຫ້ນັກຂ່າວ ສື່ມວນຊົນ ມີເວລາຢ່າງເຕັມທີ່ ສຸມທຸກຫົວຄິດປັນຍາ ເຂົ້າໃນວຽກງານ ໃຫ້ສຳເລັດດ້ວຍດີ, ຕອບສະໜອງໄດ້ ຄວາມຮຽກຮ້ອງຕ້ອງການ ໃນໄລຍະໃໝ່ ດ້ວຍຄຸນນະພາບອັນໃໝ່ ເທົ່າທຽມກັບ ມາດຕະຖານພາກພື້ນ ແລະ ສາກົນ.
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
