ໃນວັນທີ 10 ສິງຫາ 2022 ທີ່ສະພາແຫ່ງຊາດ ໄດ້ມີພິທີລົງນາມເຊັນຂໍ້ຕົກລົງຮ່ວມ ວ່າດ້ວຍ ການປະສານງານ ລະຫວ່າງ ກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ (ສພຊ) ກັບ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ (ຊສ). ໂດຍມີການຮ່ວມລົງນາມ ລະຫວ່າງ ທ່ານ ນາງ ບຸນຄໍາ ວໍລະຈິດ ກໍາມະການສູນກາງພັກ ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ທ່ານ ລິນຄໍາ ດວງສະຫວັນ ກໍາມະການສໍາຮອງສູນກາງພັກ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ໂດຍການເປັນສັກຂີພິຍານຂອງ ທ່ານ ສົມມາດ ພົນເສນາ ກຳມະການສູນກາງພັກ ຮອງປະທານສະພາແຫ່ງຊາດ ໂດຍມີ ຮອງລັດຖະມົນຕີ, ຮອງປະທານກໍາມາທິການຕ່າງໆ ປະຈຳສະພາແຫ່ງຊາດ ແລະ ພາກສ່ວນທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມ.
ຜ່ານມາໄດ້ມີຂໍ້ຕົກລົງຮ່ວມ ວ່າດ້ວຍການປະສານງານ ລະຫວ່າງ ຄະນະເລຂາທິການສະພາແຫ່ງຊາດ ກັບຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 01/ຄລສ-ຫສນຍ, ລົງວັນທີ 11 ສິງຫາ 2021 ທີ່ເປັນເຄື່ອງມືໃນການປະສານງານຂອງສະພາແຫ່ງຊາດກັບລັດຖະບານກໍຕາມ ແຕ່ເພື່ອຮັບປະກັນໃນການປະສານງານວຽກງານວິຊາສະເພາະຕ່າງໆ ໃຫ້ມີປະສິດທິພາບ ແລະ ປະສິດທິຜົນ ຈຶ່ງໄດ້ຮ່ວມກັນລົງລາຍເຊັນໃນມື້ນີ້ ຊຶ່ງໄດ້ກຳນົດລະອຽດກ່ຽວກັບຫຼັກການ, ຂອບເຂດ, ລະບຽບການ, ເນື້ອໃນ, ຂັ້ນຕອນ, ວິທີການປະສານງານ ລະຫວ່າງ ກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ແລະ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ເພື່ອອໍານວຍຄວາມສະດວກ ໃຫ້ແກ່ການເຄື່ອນໄຫວວຽກງານຂອງສະພາແຫ່ງຊາດ ແລະ ລັດຖະບານ ຕາມພາລະບົດບາດ, ສິດ ແລະ ໜ້າທີ່ ຂອງຕົນ ແນໃສ່ຮັບປະກັນການເປັນເສນາທິການທີ່ດີໃຫ້ແກ່ຄະນະປະຈໍາສະພາແຫ່ງຊາດ ແລະ ຄະນະລັດຖະບານ ໃນການປະຕິບັດໜ້າທີ່ວຽກງານ ໃຫ້ມີປະສິດທິພາບ, ປະສິດທິຜົນ, ວ່ອງໄວ, ຮັດກຸມ ແລະ ທັນເວລາ.
ຂໍ້ຕົກລົງຮ່ວມກັນ ສະບັບນີ້ ໄດ້ກໍານົດການປະສານງານ ມີ 5 ເນື້ອໃນຕົ້ນຕໍ ຄື: 1. ການກະກຽມເນື້ອໃນໃຫ້ແກ່ກອງປະຊຸມສະພາແຫ່ງຊາດ; 2. ການກະກຽມເນື້ອໃນໃຫ້ແກ່ກອງປະຊຸມຄະນະປະຈໍາສະພາແຫ່ງຊາດ; 3. ການກະກຽມເນື້ອໃນໃຫ້ແກ່ກອງປະຊຸມຄົບຄະນະຂອງກໍາມາທິການ; 4. ການກະກຽມເນື້ອໃນໃຫ້ແກ່ກອງປະຊຸມຮ່ວມ ລະຫວ່າງ ກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ກັບ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ 5. ການປະສານງານວຽກງານອື່ນ ແລະ ຍັງຈະເປັນເຄື່ອງມືໜຶ່ງປະກອບສ່ວນຊ່ວຍໃຫ້ພວກເຮົາ ໃນການສ້າງຄວາມເຂັ້ມແຂງທາງດ້ານວິຊາການ ໃຫ້ແກ່ພະນັກງານ-ລັດຖະກອນ ຂອງກຳມາທິການ ແລະ ກະຊວງຂອງພວກເຮົາ ທັງຈະເຮັດໃຫ້ພວກເຮົາ ມີການເຄື່ອນໄຫວວຽກງານຮ່ວມກັນໃນການພັດທະນາເສດຖະກິດ-ສັງຄົມແຫ່ງຊາດ ຕາມທິດຍືນຍົງ ແລະ ສີຂຽວ.
ນອກນີ້, ຂໍ້ຕົກລົງດັ່ງກ່າວ ຈະເປັນເຄື່ອງມືໜຶ່ງ ທີ່ປະກອບສ່ວນຊ່ວຍໃນການສ້າງຄວາມເຂັ້ມແຂງທາງດ້ານວິຊາການ ໃຫ້ແກ່ພະນັກງານ-ລັດຖະກອນ ຂອງກຳມາທິການ ແລະ ກະຊວງ ຂອງພວກເຮົາ ທັງຈະເຮັດໃຫ້ພວກເຮົາ ມີການເຄື່ອນໄຫວວຽກງານຮ່ວມກັນ ແລະ ຮູ້ຈັກ ຮັກແພງໃກ້ຊິດ ສະນິດສະໜົມກັນຫຼາຍຂຶ້ນກວ່າເກົ່າ.
