ທ່ານ ສີເມືອງ ສີລາວົງ ຜູ້ອຳນວຍການສະຖານີວິທະຍຸ-ໂທລະພາບເມືອງໂຂງ ແຂວງຈຳປາສັກ ໃນໂອກາດວັນສື່ມວນຊົນ ແລະ ພິມຈຳໜ່າຍ ຄົບຮອບ 72 ປີ (13/8/1950-13/8/2022) ໄດ້ໃຫ້ສຳພາດເມື່ອບໍ່ດົນນີ້ວ່າ: ຕະຫລອດໄລຍະ 72 ປີ, ສື່ມວນຊົນລາວ ໄດ້ເປັນອາວຸດອັນແຫລມຄົມຂອງພັກ ແລະ ລັດ, ໄດ້ປະກອບສ່ວນເຂົ້າໃນຂະບວນການປະຕິວັດປົດປ່ອຍປະເທດຊາດ ອອກຈາກແອກປົກຄອງຂອງຕ່າງຊາດ, ສື່ມວນຊົນ ໄດ້ກາຍເປັນເວທີຂອງມະຫາຊົນ ໃນການໂຄສະນາເຜີຍແຜ່ຂໍ້ມູນຂ່າວສານຕ່າງໆ ທີ່ສ່ອງແສງຄວາມເປັນຈິງ ແລະ ຕໍ່ຕ້ານສິ່ງຫຍໍ້ທໍ້ທີ່ປະກົດຂຶ້ນໄດ້ຢ່າງທັນການ. ພ້ອມນັ້ນ, ສື່ມວນຊົນຍັງໄດ້ອຸທິດກຳລັງແຮງ, ກຳລັງກາຍ, ກຳລັງໃຈ ທັງສຸມສະຕິປັນຍາ ເຂົ້າໃນການຂຽນບົດ, ຂຽນຂ່າວ ເພື່ອສະທ້ອນໃຫ້ເຫັນເຖິງດ້ານບວກ, ດ້ານລົບ ແລະ ເຫດການຕ່າງໆ ທີ່ເກີດຂຶ້ນໃຫ້ສັງຄົມ ທັງພາຍໃນ ແລະ ຕ່າງປະເທດ ໄດ້ຮັບຮູ້ຢ່າງທົ່ວເຖິງ.
ວຽກງານສື່ມວນຊົນ ກໍໄດ້ເຕີບໃຫຍ່ຂະຫຍາຍຕົວເປັນກ້າວໆມາ ເຖິງປັດຈຸບັນ ສື່ມວນຊົນລາວ ໄດ້ສືບຕໍ່ໃນການເປັນກະບອກສຽງໃຫ້ແກ່ພັກ, ລັດຖະບານ ໃນການໂຄສະນາເຜີຍແຜ່ຂໍ້ມູນຂ່າວສານຕ່າງໆ ໂດຍສະເພາະ ແນວທາງນະໂຍບາຍຂອງພັກ, ກໍຄືກົດໝາຍລະບຽບການ ແລະ ແຜນພັດທະນາເສດຖະກິດ-ສັງຄົມ, ເປັນເຄື່ອງມືໂຄ ສະນາທີ່ເຮັດໜ້າທີ່ປຸກລະດົມຂົນຂວາຍ ແລະ ເຜີຍແຜ່ຂໍ້ມູນຂ່າວສານຕ່າງໆ ໃຫ້ມວນຊົນທັງພາຍໃນ ແລະ ຕ່າງປະເທດ ໄດ້ຮັບຮູ້ຢ່າງທົ່ວເຖິງ ໂດຍຜ່ານຊ່ອງທາງຕ່າງເປັນ ຕົ້ນ ໂທລະພາບ, ວິທະຍຸ, ໜັງສືພິມ, ວາລະສານ ແລະ ສື່ອອນລາຍ ທີ່ນັບມື້ນັບເພີ່ມຂຶ້ນໃນປັດຈຸບັນ.
ທ່ານ ສີເມືອງ ສີລາວົງ ຍັງໃຫ້ຮູ້ອີກວ່າ: ພ້ອມກັນນີ້, ວັນທີ 31 ສິງຫາ ທີ່ຈະມາເຖິງນີ້, ກໍຍັງເປັນວັນສ້າງຕັ້ງສະຖານີວິທະຍຸ-ໂທລະພາບເມືອງໂຂງ ຄົບຮອບ 22 ປີເຊັ່ນດຽວກັນ ເຊິ່ງມີພາລະບົດບາດໜ້າທີ່ໃນການສົ່ງສັນຍານພາບ-ສຽງອອກອາກາດໃຫ້ຄວບຄຸມທົ່ວເມືອງ ແລະ ເມືອງອ້ອມຂ້າງໃຫ້ໄດ້ຮັບຟັງຂ່າວ, ສາລະໜ້າຮູ້ ແລະ ສິ່ງບັນເທີງຕ່າງໆ, ເບື້ອງຕົ້ນ ໃນແຕ່ລະວັນສາມາດກະຈາຍພາບ-ສຽງອອກອາກາດໄດ້ 15 ຊົ່ວໂມງ, ໃນນັ້ນ ຖ່າຍທອດໂທລະພາບແຫ່ງຊາດ ໂດຍຜ່ານລະບົບດາວທຽມໄດ້ 13 ຊົ່ວໂມງ ແລະ ຜະລິດລາຍການຂ່າວທ້ອງຖິ່ນ-ສາລະບັນເທິງ 2 ຊົ່ວໂມງ. ສຳລັບວິທະຍຸແມ່ນໄດ້ອອກອາກາດໄປພ້ອມໆກັນ ມີເຄື່ອງສົ່ງຍີຫໍ້ຮາລິດ 1 ເຄື່ອງ, ດ້ວຍກຳລັງສົ່ງ 250 ວັດ, ໃນນີ້ ໄດ້ຜະລິດລາຍການທ້ອງຖິ່ນອອກອາກາດໃນແຕ່ລະວວັນໄດ້ 4 ຊົ່ວໂມງ/ວັນ, ຖ່າຍທອດວິທະຍຸກະຈ່າຍສຽງແຫ່ງຊາດໄດ້ 8 ຊົ່ວໂມງ/ວັນ. ມາໃນປີ 2006 ພວກເຮົາໄດ້ຢຸດໃນການກະຈາຍພາບ-ສຽງອອກອາກາດຍ້ອນ ເຄື່ອງສົ່ງໂທລະພາບຖືກກະແສຟ້າຜ່າ ແລະ ບໍ່ສາມາດສ້ອມແປງໄດ້ຈົນຮອດປັດຈຸບັນ, ແຕ່ກໍໄດ້ເປີດນຳໃຊ້ວິທະຍຸກະຈາຍສຽງຢ່າງເປັນປົກກະຕີ ພ້ອມທັງມີການຍົກລະດັບເຄື່ອງສົ່ງເປັນກ້າວໆ ຈາກ 250 ວັດໃນເມື່ອກ່ອນມາເປັນ 300 ວັດ ແລ້ວກ້າວມາເປັນ 500 ວັດໃນປັດຈຸບັນ, ສາມາດອອກອາກາດກວມພື້ນທີ່ 40 ກິໂລແມັດ. ມາຮອດປີ 2022 ໄດ້ມີການປັບປຸງລະບົບຕ່າງໆຂ່າວ ເພື່ອໃຫ້ມີຂ່າວອອກທາງສະຖານີຫລາຍຂຶ້ນ ແລະ ໄດ້ທຳການອອກອາກາດທາງພາກພື້ນດິນໄປພ້ອມໆກັບ ການອອກອາກາດຜ່ານລະບົບອອນລາຍ ຫລື ເຟສບຸກ ຂອງສະຖານີພວກເຮົາ ເຮັດໃຫ້ສັງຄົມມີຄວາມສົນໃຈ ແລະ ນິຍົມຫລາຍຂຶ້ນກວ່າເກົ່າ.
ປັດຈຸບັນ ສະຖານີວິທະຍຸ-ໂທລະພາບເມືອງໂຂງ ສາມາດອອກອາກາດໄດ້ 15 ຊົ່ວໂມງ/ວັນ, ອອກອາກາດລາຍການທ້ອງຖິ່ນໄດ້ 4 ຊົ່ວໂມງ/ວັນ, ຖ່າຍທອດຈາກວິທະຍຸກະຈາຍສຽງແຫ່ງຊາດ ແລະ ວິທະຍຸກະຈາຍສຽງແຂວງຈຳປາສັກ ໄດ້ 11 ຊົ່ວໂມງ/ວັນ. ນີ້ແມ່ນໝາກຜົນຂອງການຫັນປ່ຽນຈາກອັນເກົ່າກ້າວໄປສູ່ອັນໃໝ່ ເຮັດໃຫ້ສື່ມວນຊົນໄດ້ມີການປັບປຸງ ໄປຕາມຍຸກສະໄໝທັນກັບຄວາມຮຽກຮ້ອງຕ້ອງການຂອງຜູ້ຊົມໃຊ້ໃນສັງຄົມ.
ຂ່າວ: ພຸດທະສິນ
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
