ການແຂ່ງຂັນກິລາຄົນພິການອາຊຽນ ຫຼື ອາຊຽນ ພາຣາ ເກມ ຄັ້ງທີ 11 ທີ່ນະຄອນໂຊໂລ ປະເທດອິນໂດເນເຊຍ ຮັບກຽດເປັນເຈົ້າພາບ ໄດ້ປິດສາກລົງຢ່າງເປັນທາງການ ໃນວັນທີ 6 ສິງຫາ 2022 ທີ່ສະໜາມ ມານາຮານ ພາຍຫຼັງດຳເນີນການແຂ່ງຂັນມາແຕ່ວັນທີ 30 ກໍລະກົດ ຜ່ານມາ, ໂດຍໃຫ້ກຽດເຂົ້າຮ່ວມຂອງ ທ່ານ ໂຈໂກ ວິໂດໂດ ປະທານາທິບໍດີຂອງອິນໂດເນເຊຍ, ມີຄະນະນຳ, ຄູຝຶກ ແລະ ຄະນະນັກກິລາຈາກ 11 ຊາດເຂົ້າຮ່ວມຢ່າງພ້ອມພຽງ.
ການແຂ່ງຂັນຄັ້ງນີ້ ມີການຊີງທັງໝົດ 14 ປະເພດກິລາ ປະກອບມີ ຍິງທະນູ, ແລ່ນ-ລານ, ດອກປີກໄກ່, ບັອດເຊຍ, ໝາກເສິກ, ເຕະບານ, ໂກນບານ, ຢູໂດ, ຍົກນໍ້າໜັກ, ລອຍນໍ້າ, ບານສົ່ງ, ປິ່ງປ່ອງ, ບານບ້ວງລໍ້ເລື່ອນ ແລະ ເທັນນິດລໍ້ເລື່ອນ, ໂດຍມີນັກກິລາເຂົ້າຮ່ວມເກືອບ 1.300 ຄົນ ຈາກ 11 ປະເທດ, ໃນນີ້ສະເພາະ ສປປ ລາວ ສົ່ງຄະນະນຳ ແລະ ນັກກິລາເຂົ້າຮ່ວມ ທັງໝົດ 79 ຄົນ ໃນ 6 ປະເພດກິລາຄື: ຍົກນໍ້າໜັກ, ລອຍນໍ້າ, ແລ່ນ-ລານ, ບັອດເຊຍ, ບານບ້ວງລໍ້ເລື່ອນ (ທີມຍິງ) ແລະ ໂກນບານ (ທີມຊາຍ-ຍິງ). ຜ່ານການແຂ່ງຂັນ ເຈົ້າພາບ ອິນໂດເນເຊຍ ຄອງເຈົ້າຫຼຽນຄຳ ດ້ວຍຜົນງານ 177 ຫຼຽນຄຳ, 141 ຫຼຽນເງິນ ແລະ 110 ຫຼຽນທອງ ລວມ 428 ຫຼຽນ, ອັນດັບທີ 2 ໄທ ຍາດໄດ້ 117 ຫຼຽນຄຳ, 116 ຫຼຽນເງິນ ແລະ 87 ຫຼຽນທອງ ແລະ ອັນດັບທີ 3 ຫວຽດນາມ ຍາດໄດ້ 64 ຫຼຽນຄຳ, 60 ຫຼຽນເງິນ ແລະ 56 ຫຼຽນທອງ.
ຂະນະທີ່ ທັບນັກກິລາຄົນພິການລາວ ຍາດມາໄດ້ 2 ຫຼຽນເງິນ ແລະ 7 ຫຼຽນທອງ ໂດຍ 2 ຫຼຽນເງິນ ໄດ້ຈາກ ນາງ ລັດສະໝີ ສີປະເສີດ ນັກກິລາຍົກນໍ້າໜັກຄົນພິການລາວ ຮຸ່ນນໍ້າໜັກບໍ່ເກີນ 41 ກິໂລກຣາມ ແລະ 7 ຫຼຽນທອງ ໄດ້ຈາກ ທ້າວ ເປ້ຍ ເລົາພັກດີ ນັກກິລາຍົກນໍ້າໜັກ ໄດ້ 2 ຫຼຽນທອງ, ທ້າວ ບຸນເພັດ ເທບທິດາ ນັກກິລາແລ່ນ-ລານຄົນພິການທີມຊາດລາວ ໄດ້ 2 ຫຼຽນທອງເຊັ່ນກັນ ລາຍການແລ່ນ 200 ແມັດ ແລະ 400 ແມັດ, ທ້າວ ແກ່ນ ເທບທິດາ ຍາດໄດ້ 1 ຫຼຽນທອງ ລາຍການ ແລ່ນ 100 ແມັດ ແລະ ອີກ 2 ຫຼຽນທອງຈາກ ກິລາບານບ້ວງລໍ້ເລື່ອນທີມຍິງ 5 ຄົນ (5×5) ແລະ ທີມຍິງ 3 ຄົນ (3×3).
ສຳລັບເຈົ້າພາບຄັ້ງຕໍ່ໄປ ແມ່ນປະເທດກຳປູເຈຍ ຈະເປັນເຈົ້າພາບ ໃນປີ 2023.
ສ.ສຸກ ລາຍງານຈາກນະຄອນໂຊໂລ, ອິນໂດເນເຊຍ
