ຕາມຂ່າວຈາກ CRI, ຈີນ ຈະຈັດງານ ວາງສະແດງ ການບິນ ຄັ້ງທີ14 ຢູ່ສູນວາງສະແດງ ການບິນ ສາກົນ ຈູ່ໄຫ ລະຫວ່າງ ວັນທີ8-13ພະຈິກ ປີນີ້. ປັດຈຸບັນ, ວຽກງານ ກະກຽມ ງານວາງ ສະແດງ ດັ່ງກ່າວ ພວມດຳເນີນໄປ ຢ່າງເປັນລະບຽບ. ເນື້ອທີ່ ວາງສະແດງ ໃນຮົ່ມ ຂອງງານ ວາງສະແດງ ການບິນ ໃນຄັ້ງນີ້ ປະມານ 100.000 ຕາແມັດ ໂດຍມີ ບັນດາ ວິສາຫະກິດ ທັງພາຍໃນ ແລະ ຕ່າງປະເທດ 700 ກວ່າແຫ່ງ ທີ່ມາຈາກ 40 ກວ່າປະເທດ ເຊັ່ນ: ສ.ອາເມຣິກາ, ອັງກິດ, ເຢຍລະມັນ ແລະ ປະເທດອື່ນໆອີກ ຢືນຢັນ ຈະເຂົ້າຮ່ວມ.
ໃນງານ ວາງສະແດງ ການບິນຄັ້ງນີ້ ກອງສະແດງ ການບິນ “ທີ 1 ສິງຫາ” ຂອງກອງທັບ ອາກາດຈີນ ແລະ ກອງສະແດງ ການບິນ “ແຫລວແດງ” ຂອງມະຫາ ວິທະຍາໄລ ການບິນ ກອງທັບ ອາກາດຈີນ ຈະມີການສະແດງ ລີລາການບິນ ອີກຄັ້ງໜຶ່ງ, ສ່ວນກອງທັບບົກຈີນ ຈະສົ່ງເຮີລີກົບແຕ້ ເຂົ້າຮ່ວມການ ສະແດງ ເປັນຄັ້ງທຳອິດ ແລະ ຈະສືບຕໍ່ ປະຕິບັດຮູບ ແບບວາງສະແດງ ອິນເຕີເນັດ ແລະ ເຂົ້າຊົມງານ ຕົວຈິງ “Online + Offline” ແລະ ຄາດວ່າ ຈະເລີ່ມຈຳໜ່າຍປີ້ເຂົ້າຊົມ ໃນເດືອນ ກັນຍາ ປີນີ້.
(ພາກຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
