ຕາມຂ່າວຈາກ ເວັບໄຊ bangkokbiznews, ສິງກະໂປ ເປີດເຜີຍ ດັດຊະນີ ລາຄາ ຜູ້ບໍລິໂພກ ພື້ນຖານ (core CPI)ເດືອນມິຖຸນາ ເພີ່ມຂຶ້ນ ສູ່ລະດັບ 4,4% ເມື່ອທຽບໃສ່ຕໍ່ປີ ຈາກລະດັບ 3,6% ໃນເດືອນພຶດສະພາ ສ່ວນດັດຊະນີ CPI ທົ່ວໄປ (CPI-All Items) ໃນເດືອນມິຖຸນາ ເພີ່ມຂຶ້ນເປັນ 6,7% ເມື່ອທຽບໃສ່ຕໍ່ປີ ຈາກ 5,6%ໃນເດືອນ ພຶດສະພາ ພາຍຫລັງ ກະຊວງການຄ້າ ແລະ ອຸດສາຫະກຳ ສິງກະໂປ ເປີດເຜີຍ ໃນວັນທີ25 ກໍລະກົດນີ້ວ່າ: ດັດຊະນີ CPI ພື້ນຖານ ບໍ່ລວມ ລາຄາ ໃນໝວດທີ່ພັກອາໄສ ແລະ ການຂົນສົ່ງ ທາງບົກ ຂອງເອກະຊົນ ສ່ວນດັດຊະນີ CPI ເປັນດັດຊະນີ ທີ່ຄຳນວນເງິນເຟີ້ ຈາກສິນຄ້າ ໃນທຸກໝວດ.ຂະນະທີ່ ແຮງກົດດັນ ດ້ານເງິນເຟີ້ ຂອງສິງກະໂປ ຈະຍັງຄົງຢູ່ໃນລະດັບສູງ ໃນໄລຍະຫລາຍ ເດືອນຕໍ່ໜ້າ ໂດຍຄາດວ່າ CPI ພື້ນຖານ ຈະເພີ່ມຂຶ້ນ ໃນລະດັບສູງ ໃນໄຕມາດທີ3 ກ່ອນທີ່ຈະ ປັບຕົວ ຫລຸດລົງ ໃນທ້າຍປີ. ສຳລັບ ປີນີ້ ຄາດວ່າ CPI ທົ່ວໄປ ຈະຢູ່ ລະດັບ5-6% ແລະ ດັດຊະນີ CPI ພື້ນຖານ ຈະຢູ່ ລະດັບ3-4%.
(ພາກຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
