ໃນວັນທີ 07-09 ທັນວາ 2022 ນີ້, ກອງພົນທະຫານຮາບທີ 4 ເປີດກອງປະຊຸມເຜີຍແຜ່ເຊື່ອມຊຶມມະຕິຄົບຄະນະບໍລິຫານງານສູນກາງພັກ ຄັ້ງທີ 4 ສະໄໝທີ XI ແລະ ເອກະສານການເມືອງ-ແນວຄິດ ຢູ່ທີ່ສະໂມສອນກົມກອງ, ໂດຍການເປັນປະທານຂອງ ສະຫາຍ ພົນຈັດຕະວາ ສົມຈິດ ກິດຕິຍະລາດ ເລຂາຄະນະພັກກອງພົນ ຫົວໜ້າການເມືອງກອງພົນທີ 4, ມີຄະນະພັກ-ຄະນະບັນຊາກອງພົນ, ຄະນະພັກ-ຄະນະຫ້ອງ ອົງການ 5 ຫ້ອງ, ພະແນກການ, ກອງພັນໃຫຍ່, ກອງພັນນ້ອຍ, ກອງຮ້ອຍເອກະລາດ ເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວຄະນະພັກ-ຄະນະບັນຊາກອງພົນ ໄດ້ຜັດປ່ຽນກັນຂຶ້ນເຜີຍແຜ່ເອກະສານໃຫ້ພະນັກງານຫຼັກແຫຼ່ງທົ່ວກອງພົນໄດ້ເຊື່ອມຊຶມໃນຄັ້ງນີ້ລວມມີ: ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 4 ສະໄໝທີ XI, ດຳລັດວ່າດ້ວຍການປະຢັດ ແລະ ຕ້ານການຟຸມເຟືອຍ, ເອກະສານສຶກສາອົບຮົມການເມືອງ-ແນວຄິດ ໃຫ້ພະນັກງານ-ນັກຮົບທົ່ວກອງພົນໃນໄລຍະໃໝ່, ເອກະສານສຶກສາອົບຮົມກ່ຽວກັບກົດໝາຍຂອງລັດ ແລະ ລະບຽບວິໄນຂອງກອງທັບ, ເອກະສານການຜັນຂະຫຍາຍມະຕິ ແລະ ການຈັດຕັ້ງປະຕິບັດແນວທາງ, ແຜນນະໂຍບາຍຂອງພັກ, ເອກະສານເພີ່ມທະວີການປະຢັດ ແລະ ຕ້ານການຟຸມເຟືອຍ, ເອກະສານຢຸດທະສາດ ແລະ ການຫັນປ່ຽນໂດຍສັນຕິ ຕິດພັນກັບການຕ້ານປະກົດການຫຍໍ້ທໍ້ພາຍໃນກອງທັບ, ເອກະສານບົດສະຫຼຸບວຽກງານການເມືອງ-ແນວຄິດ ທົ່ວກອງທັບ ແລະ ຜ່ານແຈ້ງການຂອງກະຊວງປ້ອງກັນປະເທດວ່າດ້ວຍການຍ້າຍພະແນກກົດໝາຍໃຫ້ຂຶ້ນກັບຫ້ອງການເມືອງ ກອງພົນທະຫານຮາບທີ 4. ທັງນີ້ກໍ່ເພື່ອເຮັດໃຫ້ພະນັກງານ, ສະມາຊິກພັກ ໄດ້ຮັບຮູ້ ເຊື່ອມຊຶມ ແລະ ກຳແໜ້ນກ່ຽວກັບບັນດາເອກະສານແຕ່ລະເອກະສານ, ບັນດາພື້ນຖານທິດສະດີຫຼັກການເມືອງ-ແນວຄິດ, ການເຄື່ອນໄຫວ ແລະ ການກະທຳຂອງພັກ-ລັດ, ສ້າງຄວາມເຊື່ອໝັ້ນຕໍ່ອຸດົມການຂອງພັກ, ສ້າງທັດສະນະຫຼັກໝັ້ນການເມືອງໃຫ້ຖືກຕ້ອງໃຫ້ພະນັກງານສະມາຊິກພັກຮັບຮູ້ເຂົ້າໃຈແຈ້ງ ກ່ຽວກັບຢຸດທະສາດຫັນປ່ຽນໂດຍສັນຕິຕິດພັນກັບການຕ້ານປະກົດການຫຍໍ້ທໍ້ໃນກອງທັບ, ຈຳແນກໄດ້ມິດສັດຕູຢ່າງຈະແຈ້ງ, ກຳໄດ້ບັນດາກົດໝາຍຂອງລັດ, ລະບຽບວິໄນຂອງກອງທັບ, ເພີ່ມທະວີການປະຢັດ ແລະ ຕ້ານການຟຸມເຟືອຍ ພາຍໃນກອງທັບໃຫ້ຫຼຸດໜ້ອຍຖອຍລົງເທື່ອລະກ້າວ.
ໃນໂອກາດຕອນທ້າຍກອງປະຊຸມ ສະຫາຍ ພົນຈັດຕະວາ ສົມຈິດ ກິດຕິຍະລາດ ເລຂາຄະນະພັກກອງພົນ ຫົວໜ້າການເມືອງກອງພົນທີ 4 ໄດ້ໂອ້ລົມຊີ້ນຳໃຫ້ພະນັກງານຫຼັກແຫຼ່ງໃຫ້ນຳເອົາບັນດາເນື້ອໃນເອກະສານດັ່ງກ່າວ ໄປຈັດຕັ້ງປະຕິບັດເຂົ້າໃນວຽກງານລວມຂອງກົມກອງ ໃຫ້ປະກົດຜົນເປັນຈິງ ແລະ ຮຽກຮ້ອງໃຫ້ຄະນະບັນຊາແຕ່ລະຂັ້ນນຳເອົາເອກະສານດັ່ງກ່າວນີ້ເຜີຍແຜ່ໃຫ້ພະນັກງານ-ນັກຮົບ ກົມກອງຂອງຕົນໃຫ້ທົ່ວເຖິງ.
ຂ່າວໂດຍ: ຮ້ອຍໂທ ໂພຄຳ ພອນປະເສີດ (ນັກຂ່າວກອງພົນທີ 4)
