ອີງຕາມການໃຫ້ສໍາພາດຂອງທ່ານ ພອນປະເສີດ ທອງສີທາວົງ ຫົວໜ້າພະແນກກະສິກໍາ ແລະ ປ່າໄມ້ ແຂວງອັດຕະປື ຄັ້ງວັນທີ 18 ພະຈິກ 2022 ນີ້ວ່າ: ຢູ່ແຂວງອັດຕະປື ມີ 5 ບໍລິສັດ ທີ່ໄດ້ຮັບອະນຸຍາດ ໃນການລົງທືນສໍາປະທານທີ່ດິນເພື່ອປູກຢາງພາລາ ແລະ ສ້າງຕັ້ງໂຮງງານປຸງແຕ່ງຢາງພາລາ,ໂດຍທັງ 5 ບໍລິສັດ ແມ່ນບໍລິສັດຈາກປະເທດສາທາລະນະລັດ ສັງຄົມນິຍົມຫວຽດນາມ, ສ່ວນເນື້ອທີ່ທີ່ໃຫ້ອະນຸຍາດສໍາປະທານແມ່ນມີຢູ່ 4 ເມືອງຄື: ເມືອງໄຊເສດຖາ, ເມືອງສາມັກຄີໄຊ, ເມືອງຊານໄຊ ແລະ ເມືອງພູວົງ.
ການປູກຢາງພາລາ ຢູ່ແຂວງອັດຕະປື ແມ່ນໄດ້ເລີ່ມແຕ່ປີ 2008 ເປັນຕົ້ນມາ, ເຊິ່ງທົ່ວແຂວງມີເນື້ອທີ່ປູກຢາງພາລາທັງໝົດ 15.564 ກວ່າເຮັກຕາ,ໃນນີ້ ເນື້ອທີ່ສາມາດກຼີດເອົານໍ້າຢາງໄດ້ແລ້ວ 9.123 ກວ່າເຮັກຕາ, ຜົນຜະລິດເປັນນໍ້າຢ່າງ 46.531 ກວ່າໂຕນຕໍ່ປີ, ຜະລິດເປັນຢາງກ້ອນໄດ້ປະມານ 15.510 ກວ່າໂຕນ,ໃນນັ້ນ: ສົ່ງອອກເປັນນໍ້າຢາງຈໍານວນ 7.812 ກວ່າໂຕນ ມູນຄ່າ 2 ລ້ານ 7 ແສນ ກວ່າໂດລາ ແລະ ສົ່ງອອກເປັນຢາງກ້ອນ ຈຳນວນ 12.906 ກວ່າໂຕນ ມູນຄ່າ 20 ລ້ານ 6 ແສນ ກວ່າໂດລາ,ລວມມູນຄ່າສົ່ງອອກທັງໝົດ 23 ລ້ານກວ່າໂດລາຕໍ່ປີ.
ທ່ານ ພອນປະເສີດ ທອງສີທາວົງ ຫົວໜ້າພະແນກກະສິກໍາ ແລະ ປ່າໄມ້ ແຂວງອັດຕະປື ໄດ້ໃຫ້ຮູ້ຕື່ມວ່າ: ບັນດາໂຄງການປູກຢາງພາລາ ທີ່ແຂວງອັດຕະປື ອະນຸຍາດໃຫ້ບັນດາບໍລິສັດມາສໍາປະທານທີ່ດິນດັ່ງກ່າວນັ້ນ ລ້ວນແຕ່ໄດ້ຮັບການອະນຸຍາດ ຖືກຕ້ອງຕາມລະບຽບຫຼັກການ ແລະ ກົດໝາຍທຸກຂັ້ນຕອນ ແລະ ບັນດາໂຄງການດັ່ງກ່າວ ໄດ້ກາຍເປັນຖານລາຍຮັບທີ່ໝັ້ນຄົງໃຫ້ແກ່ພໍ່ແມ່ປະຊາຊົນ ສ້າງວຽກເຮັດງານທໍາໃຫ້ປະຊາຊົນ ສ້າງລາຍຮັບໃຫ້ທ້ອງຖິ່ນ ແລະ ໄດ້ປະກອບສ່ວນອັນສໍາຄັນໃນການພັດທະນາເສດຖະກິດ-ສັງຄົມ ຂອງແຂວງອັດຕະປື ໃຫ້ມີການຂະຫຍາຍຕົວເທື່ອລະກ້າວ.
#ຂ່າວ: ວັດທະນາ
#ມີເດຍລາວ#ອັດຕະປື
