ຖິງແມ່ນສະມາຄົມ ເພື່ອພັດທະນາແມ່ຍິງ ແລະ ການສຶກສາກົດໝາຍມີຜົນສຳເລັດໃນການສົ່ງເສີມຄວາມສະເໝີພາບລະຫວ່າງຍິງ-ຊາຍໃນ10ຜ່ານມາຜ່ານຫ້ອງການໃຫ້ຄໍາປຶກສາ ແລະ ຊ່ວຍເຫຼືອແມ່ຍິງ. ສະມາຄົມຍັງໄດ້ມີໂຄງການເຊື່ອມສານບົດບາດຍິງ-ຊາຍ ຢູ່ບັນດາບ້ານເປົ້າໝາຍ
ພະນັກງານຂັ້ນສູງຂອງສະມາຄົມໄດ້ຢືນຢັນໃນວັນທີ 18 ພະຈິກ 2022, ທີ່ໂຮງແຮມດອນຈັນ ພາເລດ, ສະມາຄົມ ເພື່ອພັດທະນາແມ່ຍິງ ແລະ ການສຶກສາກົດໝາຍ ໄດ້ຈັດງານສະເຫຼີມສະຫຼອງວັນສ້າງຕັ້ງສະມາຄົມ ຄົບຮອບ 10 ປີ, ເພື່ອເປັນການສະເຫຼີມສະຫຼອງ, ລາຍງານ ແລະ ແບ່ງປັນບັນດາຜົນສໍາເລັດຕ່າງໆຂອງສະມາຄົມ ໃຫ້ແກ່ບັນດາຄູ່ຮ່ວມງານພາກສ່ວນຕ່າງໆທັງພາກລັດ, ອົງການຈັດຕັ້ງສາກົນ, ບັນດາຜູ້ໃຫ້ທຶນສະໜັບ ສະໜູນ ແລະ ອົງການຈັດຕັ້ງທາງສັງຄົມ ໃຫ້ຮັບຮູ້ ແລະ ເຂົ້າໃຈກ່ຽວກັບ ການເຄື່ອນໄຫວວຽກງານຂອງສະມາຄົມ ແລະ ການຮ່ວມມືທີ່ດີຮ່ວມກັນ. ໂດຍການໃຫ້ກຽດເປັນປະທານໂດຍທ່ານ ນາງ ຜ່ອງສີ ປັນຍານຸວົງ, ປະທານ ຄະນະບໍລິຫານງານ ສະມາຄົມ ເພື່ອພັດທະນາແມ່ຍິງ ແລະ ການສຶກສາກົດໝາຍ. ໂດຍມີຜູ້ເຂົ້າຮ່ວມທີ່ມາຈາກບັນດາກະຊວງທີ່ກ່ຽວຂ້ອງ, ຄູ່ຮ່ວມງານພາກລັດຂັ້ນສູນກາງ ແລະ ຂັ້ນນະຄອນຫຼວງວຽງຈັນ, ສະຖານທູດ, ຜູ້ໃຫ້ທຶນ, ອົງການຈັດຕັ້ງສາກົນ ແລະ ອົງການຈັດຕັ້ງສັງຄົມ, ມະຫາວິທະຍາໄລແຫ່ງຊາດ ແລະ ຈໍາປາສັກ, ຄູ່ຮ່ວມງານຂັ້ນເມືອງ ແລະ ຕ້າງໜ້າຈາກບ້ານເປົ້າໝາຍຂອງໂຄງການເຂົ້າຮ່ວມ.
ໃນຕະຫຼອດໄລຍະ 10 ປີຜ່ານມານີ້, ສະມາຄົມ ເພື່ອພັດທະນາແມ່ຍິງ ແລະ ການສຶກສາກົດໝາຍ ແມ່ນມີຄວາມພະຍາຍາມສຸມໃສ່ຢ່າງບໍ່ຢຸດຢັ້ງໃນການປັບປຸງເງື່ອນໄຂຕ່າງໆ ເພື່ອອໍານວຍຄວາມສະດວກໃຫ້ແກ່ແມ່ຍິງ ແລະ ເດັກຍິງ ແລະ ບຸກຄົນທົ່ວໄປໃນສັງຄົມ, ໂດຍການໂຄສະນາປູກຈິດສໍານຶກກ່ຽວກັບສິດຂອງແມ່ຍິງ ແລະ ສົ່ງເສີມຄວາມສະເໝີພາບລະຫວ່າງຍິງ-ຊາຍ, ເປັນເຈົ້າການນໍາພາໃນການປ່ຽນແປງພຶດຕິກໍາ ແລະ ທັດສະນະຄະຕິຂອງຄົນ ໂດຍສະເພາະແມ່ນຊາວໜຸ່ມ ຢູ່ໃນຊຸມຊົນ ແລະ ສັງຄົມ ທີ່ມີຫຼາກຫຼາຍຊົນເຜົ່າ, ເຂດຫ່າງໄກສອກຫຼີກ, ເພື່ອໃຫ້ຄອບຄົວ, ຊຸມຊົນ ແລະ ສັງຄົມ ໄດ້ຢູ່ຮ່ວມກັນຢ່າງສັນຕິ, ເພີ່ມທະວີການຍົກສູງ ແລະ ເຄົາລົບສິດທິຂອງແມ່ຍິງ, ພ້ອມກັນຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກເພື່ອເຮັດໃຫ້ເຂົາເຈົ້າສາມາດເຂົ້າເຖິງຄວາມຍຸຕິທໍາໄດ້ຫຼາຍຂຶ້ນ ໂດຍຜ່ານຫ້ອງການໃຫ້ຄໍາປຶກສາ ແລະ ຊ່ວຍເຫຼືອແມ່ຍິງ. ສະມາຄົມຍັງໄດ້ມີໂຄງການເຊື່ອມສານບົດບາດຍິງ-ຊາຍ ຢູ່ບັນດາບ້ານເປົ້າໝາຍ ໂດຍການສ້າງກຸ່ມອາສາສະໝັກຂຶ້ນຫຼາຍກຸ່ມຢູ່ຊຸມຊົນ. ໄດ້ຝຶກອົບຮົມ ແລະ ສົ່ງເສີມ ກຸ່ມເຫຼົ່ານີ້ ໃຫ້ກາຍເປັນຕົວແບບຂອງການເຄົາລົບສິດສະເໝີພາບລະຫວ່າງຍິງ-ຊາຍ, ສົ່ງເສີມການມີສ່ວນຮ່ວມຂອງແມ່ຍິງໃນຊຸມຊົນຂອງເຂົາເຈົ້າ. ນອກຈາກນັ້ນ, ຍັງໄດ້ປະສານສົມທົບກັບ ມະຫາວິທະຍາໄລແຫ່ງຊາດ, ມະຫາວິທະຍາໄລຈໍາປາສັກ ແລະ ວິທະຍາໄລຕ່າງໆ ເພື່ອເຊື່ອມສານບົດບາດ ຍິງ-ຊາຍ ເຂົ້າໃນຫຼັກສູດການຮຽນການສອນ ແລະ ກິດຈະກຳໂຄສະນາເຜີຍແຜ່ກົດໝາຍໃຫ້ຫຼາຍຂຶ້ນ ເພື່ອເຮັດໃຫ້ນັກຮຽນ, ນັກສຶກສາທີ່ເປັນຄົນຮຸ່ນໃໝ່ມີທັດສະນະຄະຕິທີ່ດີຕໍ່ເພດກົງກັນຂ້າມ ແລະ ທັບມ້າງຮີດເກົ່າຄອງເດີມທີ່ມີການຈຳແນກ, ມີຄວາມລ້າຫລັງ ແລະ ຄວາມບໍ່ສະເໝີພາບໃຫ້ໄດ້ຮັບການປັບປຸງໃຫ້ດີຂຶ້ນ.
#medialaos#VientianeTimeslaos.la
