ຕອນບ່າຍວັນທີ 16 ພະຈິກນີ້ ທີມງານບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນ, ໄດ້ເດີນທາງໄປແຂວງອຸດົມໄຊ ແລະ ໄດ້ຮັບການຕ້ອນຮັບຢ່າງອົບອຸ່ນ ຈາກທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງໆ ອຸດົມໄຊ ພ້ອມດ້ວຍຄະນະ.
ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງໆອຸດົມໄຊ ໄດ້ສະແດງຄວາມຂອບໃຈຕໍ່ທີມງານ CMG ແລະ ສະມາຄົມນັກປະພັນລາວ ໃນການມາເຮັດວຽກຄັ້ງນີ້ ແລະ ຖືວ່າເປັນກິດຈະກຳທີ່ມີຄວາມໝາຍຄວາມສໍາຄັນຕໍ່ແຂວງອຸດົມໄຊ, ຫວັງວ່າທີມງານຈະໄດ້ນໍາເອົາຂໍ້ມູນຂອງແຂວງອຸດົມໄຊໄປຂຽນເປັນບົດເລື່ອງວັນນະຄະດີ ເລື່ອງສັ້ນ ເພື່ອເຜີຍແຜ່ໃຫ້ແກ່ພາຍໃນ ແລະ ຕ່າງປະເທດ.
ຫຼັງຈາກນັ້ນ, ທີມງານກໍໄດ້ຮັບຟັງການລາຍງານສະພາບໂດຍລວມຂອງພາກສ່ວນຕ່າງໆມີ: ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະສິກໍາ ແລະປ່າໄມ້, ອຸດສາຫະກຳ ແລະການຄ້າ, ການຊົດເຊີຍຜູ້ທີ່ໄດ້ຮັບຜົນກະທົບຈາກທາງລົດໄຟລາວ-ຈີນ, ແຜນການ ແລະ ການລົງທຶນ ພ້ອມທັງຕອບຖາມຈາກບັນດານັກຂຽນ ແລະ ນັກຂ່າວ.
